Kalbyň kir-kimirden dolar dessine,
Töhmede çyn diýip, güwä geçeňde.
Ýoluň ýiter haý diýmeseň hetdiňe,
Içi puldan doly jüwä geçeňde.

Ýaşap bilseň guly bolman haramyň,
Miwesini berer çeken azabyň,
Ýa-da düşsün duluňdaky halalyň,
Ýanyň gyz-gelinli çülä geçeňde.

Jaýlap başar içiňdäki gahary,
Paýlap başar göwnüňdäki bahary,
Aş bilen doýursaň garyp-gasary,
Mäşden ýüz öwürip, tüwä geçeňde.

Dünýe şemal deýin, geçer deňiňden,
Dana-da, akmagam çykar öňüňden,
Kynçylyksyz gelip durka eliňden,
Ýitirýän zadyň ýok günä geçeňde.

Durmuşdaky ornuň çalşykly çemçe,
Özi adam bolan, bardyr-la sençe,
Ömrüňden gymmada düşer temençe,
Köşgüň ýegsan bolup, kümä geçeňde.

Monça bolup ýören bolsaň düýnüňden,
Ertiriňe ynam ýokdur düýbünden,
Diňe özüň utanarsyň müýnüňden,
Dirilik ýagdaýdan ölä geçeňde.

Ýazmyrat Çörli.

File engine/modules/thanks.php not found.