Özüñize mälim, men bir kino tankytçysy-ha däl. Hemme teleseriallary görýän diýsemem ýalançy. Ýöne soñky döwür mende oñat täsir döreden teleserial hakynda aýtman durup biljek däl. Özümçe halan we halamadyk epizodlarymyñ üstünde durup geçjek.
Geçen hepde BKM-nyñ prodýuserliginde, Ýylmaz Erdoganyñ ýazyp, režissýorlyk etmeginde we baş rolda oýnamagynda "Inci taneleri" atly teleserial tomaşaçylara hödürlendi.
Dogrusy, ilkinji reklamasyny görenimden bäri bu teleseriala garaşyp ýördüm. Ilki bilen-ä Ýylmaz Erdoganyñ galamyndan çykan işiñ ýöwsel bolmajagy bellidi. Galyberse-de, reklama hakykatdanam serialy görmäge isleg oýaryp biljek derejede oñatdy.
Serialda (beýtmändigine garamazdan) aýalyny öldürendigini boýun alyp, tussag edilen Ademiñ tussaglykdan boşandan soñky durmuşy beýan edilýär. Serialyñ ilkinji epizody Ademiñ tussag edilýän pursaty bolup, bu Ýylmaz Erdoganyñ sesinden ajaýyp goşgy bilen tomaşaçylara ýetirilýär. Ýeri gelende aýtsam, ilkinji bölümden iñ halan epizodymam şol boldy. Serialyñ sýužeti hakda gysgarak durup geçeýin. Edebiýat mugallymy Adem tussaglykdan boşandan soñ kiçiräjik myhmanhanada özüne otag tutunyp ýaşap başlaýar. Ine, şol ýerde-de ykbal ony Dilbere sataşdyrýar. Owadan, ýaş zenan ilkinji gabatlaşan pursatlaryndan başlap, Adem bilen gyzyklanýar. Bu kämil edebiýat mugallymynyñ durmuş hekaýatyny diñlemek isläp, kiçiräjik bahanalar bilen gapysyny kakýar. Aslynda, Dilberiñem durmuş hekaýaty Ademiñkiden peslär ýaly däl. Pawýonda tans edýän Dilberiñ tarypy dillerde. Ýöne ol töweregindäki erkek kişileriñ hiç birine gabagyny galdyrmaýar. Belkem, 50-55 ýaşlaryndaky Ademiñ ýaşuly agraslygy ony özüne çekendir. Ademde edebiýat mugallymlaryna mahsus söze çeperlik jemlenen bolup, serialdaky beýleki keşpler bilen bolan dialoglarda bu görnetin ýüze çykýar. Şeýle dialoglar serialy beýlekilerden tapawutlanýan uly artykmaçlyk diýip hasap edýärin. Meselem, serialyñ ortalaryndaky epizodlarynyñ birinde Dilber Ademe
- Aslynda, bu adamlaryñ hiç biri özüne meñzänok diýýär.
Adem ony makullaýar. Soñra aralaryndaky gürrüñdeşlikden soñ Dilber oña
- Sen saña meñzeýäñ - diýýär. Adem hezil edinip gülýär-de
- Senem saña juda meñzeýäñ - diýýär.
Sýužet hakda şulary aýtmak bilen çäkleneýin. Hem uzak ýazyp oturmagy halamok, hemem özüñiz tomaşa etjekleriñiz bardyr belki.
Indi serialdaky göwnüme ýakmadyk ýeke-täk epizod hakda durup geçeýin. Tomaşaçylar tarapyndan iñ köp gyzyklanylan hatda, trend bolan Dilberiñ tans edýän epizody.
Seriallarda tans görmäge garşy däl, ýöne kameranyñ Dilberiñ bedenindäki käbir detallara çendenaşa ünsi çekmegi tansy juda ýeñles görkezipdir. Onda-da Ýylmaz Erdogan ýaly şahyryñ galamyndan çykan işde ol detallary görmek islemezdim. Çünki, men zenanlaryñ esasan, ruhy akly bilen öñe çykmagynyñ tarapdary. Ademde hem Dilberiñ häsiýeti we ruhy aýratynlyklary gyzyklanma oýarýar. Muny onuñ Dilberiñ tansyny biparh nazarlar bilen synlaýşy hem subut edýär. Şeýle bolsa şol detallar görkezilmänem bilerdi diýip pikir edýärin.
Teleserialdaky esasy halan aýratynlyklarymyñ biri hem adatça bolşy ýaly ýaş oglan bilen ýaş gyzyñ söýgüsini döretmän, adatdan daşary söýgini açyp görkezmekleri. Indiki bölümlerine sabyrsyzlyk bilen garaşýan we teletomaşaçylara bu serialy maslahat berýärin.


Pawýon - aýdym-sazly, içgi içilýän ýer.