Uly girdeji getiren ýönekeý pikirler (1-nji bölüm)


Her ýyl dünýä boýunça milliarderleriň sany köpelip barýar. Aşakda käbir ýönekeý ynsanlaryň nädip baýandygy hakynda gürrüň ederis.

Ideg talap etmeýän «haýwanlar»


Köplenç ajaýyp pikirler dynç alyş wagtynda gelýändigi köpümize bellidir. Amerikanyň Kaliforniýa ştatynyň Los-Gatos şäherinde ýaşaýan 39 ýaşly Geri Dal bilenem şeýle boldy. Onuň dostlary öý haýwanlary hakynda gürrüňleşip, olara örän köp wagt we güýç sarp edýändiklerinden şikaýat edýärler.

Bu waka geçen asyryň 70 ýyllarynda: klýoş jinsylar, gijeki diskotekalar, Wetnamdaky uruş, Amerika ykdysadyýetiniň peselen döwründe bolupdy. Ine şeýle wagtda Dal adamlar üçin täze güýmenje tapmagy we biraz pul işlemegi ýüregine düwýär. Ol bazara «Pet Rock», ýagny «daş öý haýwany» diýip atlandyrylan towar hödürleýär. Aslynda bolsa Dal Meksikaň plýažlarynyň birinden getirilen daşlary satuwa çykarypdy.

Özi reklama agenti bolup işlänligi sebäpli Geri her bir plany ýokary derejede hödürlemegi bilýärdi. Şonuň üçin ol daş haýwanlara nähili ideg etmelidigi hakynda 30 sahypadan ybarat gollanma ýazdy we özüniň "haýwanlaryny" ideal öý haýwanlary diýip atlandyrdy. Çyndanam daş haýwanlar eýesinden artykmaç üns we ideg talap etmeýärdi. Olary naharlamak, gezdirmäge alyp çykmak ýa-da weterinara alyp gitmek gerek däldi. Gollanmada olary nädip idetmelidigi we hatda ele öwretmek boýunça hem maslahatlar berilendi. Hususan, daş haýwanlar "otur", "ýat", "ýuwaş" we "bas" ýaly sözleri düşünýändigi ýazylandy. Esasam daş haýwanyň eýesi "bas" sözinden peýdalanyp özüni huliganlardan gorap bilýärdi. Munuň üçin gollanmada eli jüwä salmak we daş haýwany jüwüden alyp, oňa "Bas!" diýip buýruk berip, huliganyň kellesine urmalydygy ýazylandy. Mundan başga-da bu ugurtapyjy jenap öz daş haýwanlary üçin kartondan ýasalan öýjagazlaram oýlap tapypdy.

Geň ýeri bu howply işe pul dikmek isleýän maýadarlaram derrew tapyldy we 1975 ýylyň Täze ýyl baýramyna çenli daş haýwanlar söwdasy ýokary derejesine ýetdi. Bu özboluşly sowgady 3,95 dollara satyn alyp bolýardy. Birnäçe aýyň içinde Dal şärikdeşleri bilen bile bu oýunjaklardan bir ýarym milliondan köprägini satmagy başardy we aradan köp wagt geçmän millionere öwrüldi. Aradan iki ýyl geçip, bu ideýa köneldi we daş haýwanlaryň söwdasy pese düşdi. Dal bolsa jemlän puluna kiçiräk kafe satyn alyp ýene öňki işine - reklama agentligine dolandy.

File engine/modules/thanks.php not found.