çatmadan çykanda gyzlaryñ gowsy, gupbadan eşdiler sazlaryñ gowsy, bir gupba ýüz öýe ýaýradar buşluk, gyşyk çatmalarda oýanar ýaşlyk.

bir gyz iki bolar soñ ýeter üçe,
onsoñ iki üçe, görklener köçe.
alty boýdaş jora ugrarlar bäri,
öñün başlap gaýdar ‘altynyñ biri’.

biri ‘daga’ meñzär, bäşisi gaýa,
‘dag gyz’bedre sallar kyrk gulaç guýa.
çepiksizje oglan bir ýerden çykar,
gelerde ‘dag gyzyñ’ öñünde çöker.

‘armaweriñ gyzlar!’ bedräni götär,
bedre-de titrär, oglanam titrär.
‘bar boluñ!’ ýylgyrar gyzlaryñ gowsy,
sähelçe epiler dyzlaryñ gowsy,
 mele ýeri öper saçlaryñ gowsy, meger on ýedidir ýaşlaryñ gowsy,

açykdyr göwünler tämizdir ýürek,
tämiz söýgä mydam tämizlik gerek.
erninden suw beren kümüş bedreler,
sallanyp, sallanyp öýe giderler.

gañrylyp-gañrylyp ‘altynyñ biri’,
öýlerne ýetýänçä sereder bäri.
‘baý, baý ýigit çykyp gidipsiñ senem’. körär ýaş ýürekde kijijik ynam.

girer gyşyk çatma gülleriñ gowsy,
ýapar gapykilmi elleriñ gowsy.
gün geçer, aý geçer, şol gapykilim,
aýsyz gijelerde serpiler telim.
şondan ýanyp çykar şemleriñ gowsy, gaşyny çirkizer demleriñ gowsy,
gözüñe bakanda gözleriñ gowsy,

gözler bir-biriniñ suratyn çeker,
açlyk, horluk, uruş ýadyñdan çykar.
uruş tamam bolar on ýaşar ýeñiş,
mis reñk ýüzlere çaýylar kümüş.

ak jaýa öwrüler şol gara çatma,
(şahyr indi senem garalyp ýatma.
stolda boş ýatyr söýginiñ igi,
aýla, pyrla, egir, dyñzasyn söýgi!)

sözden pişge dörär, pişgeden sygyr.
alty sany bendi egirer bagyr.
dört ýa bäş bolýandyr aýdymlañ bendi,
o näme üçin beýle, altyka indi?

(adalatly bolar şahyrlyk käri,
ýetsin joralaryñ hersine biri.)
ýañy ýigitlikden saýlanan şahyr,
elli ýaşly bagşa goşgusyn gowşyr.

eýýäm elli bäşe ýetendir bagşy,
henizem gyltyzdyr aýdymlañ başy.
agtar ol, agtar ol, ýene-de agtar,
bir gün ýary gije kükürär dutar.

jägildäp dogular sazlaryñ gowsy,
bogun-bogun söker gyzlaryñ gowsy.
goý jogapsyz galsyn iñ soñky sowal, kim ol gyz? nirede? bilmek hökman däl.

ol meniñ öz syrym. jogaby - sessiz…….
ol syr meniñ bilen mazara gitsin.
bägüle öwrülip, çyksyn paşyrdap.
şol gyzyñ adyny, tutsyn pyşyrdap!