Ynsan tolgunmasy, yşky-söýgüsi, 
Ylhamy, hyjuwy, işi-azaby, - 
Biziñ üçin, ine şundan başlanýar 
Her bir täze aýyñ-günüñ hasaby! 

Şonuñ üçin täze ýylda arzuwym: 
Has köpräk joşuñ siz, köpräk tolgunyñ, - 
Ýaşan ýyllarynyñ mazasy bolmaz 
Tolgunmadan halas ynsan oglunyñ! 

Şonuñ üçin täze ýylda arzuwym: 
Söýen zadyñyzy ýürekden söýüñ, - 
Bazary göterlip, mazara döner 
Töri muhabbetsiz, söýgüsiz öýüñ! 

Şonuñ üçin täze ýylda arzuwym: 
Hyýal baglap ak ýyldyzly agyla, 
Ýerde edýän işiñizi sallarlañ, 
Hem-de ondan boluñ käte nägile! 

Şonuñ üçin täze ýylda arzuwym: 
Tolgunyñ, dörediñ, söýüñ, şatlanyñ; 
Ynjalyksyz bolsun herne ýüregñiz 
Boş şöhratdan gaçyñ hem şöhratlanyñ! 


Annaberdi AGABAÝEW.