-Suw diýdiňmi ? Wah-wah-eý ! Suwsansyň sen ! Özüňem şu petiş yssyda ýola çykaýypsyň-da. Azajyk sabyr et !
Men saňa suw bereýin . Hany kürüşgäm ?! Gyssansaň, eliňdäki zady hem gözleýäň-dä. Ýaňyja-da bardy-la ol. Wiý,ynha. Huşum gursyn ! Mör-möjek degäýmesin diýip özüm ýokardan asyp goýupdym-da. Suw diýdiňmi sen ?
Derrew kürüşgämi süpüreýin. Hany meniň arassaja matam ?Hä ynha... Indi boldy. Içi dagy lowurdap dur. Muny suwdan dolduryp bererin welin, heziller edinäýersiň. Howa-da yssy-da. Gaty suwsansyň sen...

Şeýdip ol ozalam ýerde goýulman ,ýokardan asylgy kürüşgäniň içini-daşyny akja mata bilen süpürdi,soň bedräni egip,ony suw bilenem çaýkady. Şondan soň başga bir agzy gapakly suwdan doly bedrä girip - çykan kürüşge maňa tarap uzady.
-Wah gaty suwsansyň sen . Me !
Kürüşgäniň daşy irki güýzüň gyrawy ýaly bolup çalaja bugarypp göründi. Ak bedrä çümüp gelen sowuk suwly kürüşgäni başyma çekenimde,gara daşy ýaryp çykýan buz ýaly çeşme suwuna eňegimi basandyryn öýtdüm.
-Noş bolsun-diýdi.
Aýdyşyndanam beter noş boldy.
Men suw däl-de,ýadaw bedene kuwwat berýän jadyly bir zat içen ýaly boldum. Agzym sowuk suwdan,gulagymam mylaýym sözden lezzet aldy.
Adam pahyryň göwnüni awlamak üçin ullakan zat hem gerek däl-dä. Gör-ä, ýogsam, dilänim-ä bary-ýogy bir kürüşgejik suwdy welin...






Çeşme: Garagum