«Ulumsylyk – erbet gylyk» diýýärler.
Beterräk diýsenem rastdyr rast.
Ýöne ulumsylyk etmejek bolup,
Ýyrsaryp ýörmegem gowy däldir, dost.

«Geplemseklik – erbet gylyk» diýýärler.
Beterräk diýsenem rastdyr rast.
Ýöne geplemseklik etmejek bolup,
Dommaryp ýörmegem gowy däldir, dost.


«Ýaranjanlyk – erbet gylyk» diýýärler.
Beterräk diýsenem rastdyr rast.
Ýöne ýaranjanlyk etmejek bolup,
Gomparyp ýörmegem gowy däldir, dost


«Ýaltaçylyk – erbet gylyk» diýýärler.
Beterräk diýsenem rastdyr rast.
Ýöne ýaltaçylyk etmejek bolup,
Hars urup ýörmegem gowy däldir dost.


«Basga-da köp erbet gylyk» diýýärler.
Olaryn köpdügem rastdyr rast.
Ýöne her bendimde bir söz üýtgedip,
Samyrdap durmagam gowy däl-dä, dost.

Kerim Gurbannepesow