Göwnüm göteren asmansyň,
Topraksyň — jana heň goşar.
Sesiň — durmuşyň mukamy,
Ýaňaklaryň — älemgoşar.

Şygyrsyň — kalbymy dören,
Aýdymsyň — ýetik humary.
Saçymy sypan şemalsyň,
Jemalsyň — bagtyň jemaly.

Syrymsyň ilden gizlegen,
Togap eden mährabymsyň.
Giňliksiň — göwün deprenen,
(Sen gürläňde sähra dymsyn!)

Kuwwatsyň — gop beren yşka,
Güýçsüň — gussamy omursyn!
Ykbalsyň — ykbaly bezän,
Ömrüme höwür ömürsiň!


Sapa HOMMADOW