Batdy, ýaranlar

Dört müň dört ýüz ýaşan lukman hekimiň,
Başy gara guma batdy, ýaranlar!
Kerg bedewli, agyr gürzli Rüstemiň
Ajal jylawyndan tutdy ýaranlar!

Ýusupnyň arzuwy Ýakup ýanynda,
Söýgüsi bagrynda, derdi janynda,
Kimiň gadry bardyr çarhyň ýanynda,
Ýusupny gul diýip satdy, ýaranlar!

Äleme hökm eden Isgender soltan,
Ajal tedbirine tapmady derman,
Tagtyny ýel çeken hökmi-Süleýman,
Galmady, dünýäden gitdi, ýaranlar!

Üç ýüz on üç mursal galmady biri,
Kany Asyf, Süleýmanyň weziri?
Kany ol Hak Resul Hakyň öz şiri,
Barçasyn gara ýer ýuwtdy, ýaranlar!

Magtymguly aýdar, gapyl oturmaň,
Gylça jany uzyn gaýga batyrmaň,
Ýalançyny hasret bilen ötürmäň,
Bir pasyl döwrandyr, ötdi, ýaranlar!

Magtymguly Pyragy

Hiayress,
Sag bol kop kop