Ýagşa tutup niýetleriň,
Gowa ýorup umytlaryň,
Aýagňy ýagşa ätledip,
Dosta barylýar-gelinýär,
Şeýdip mähriban bolunýar.

Gutlaýarsyň doglan günün,
Ýatlaýarsyň aglan günün,
Aňyp entek oglanlygyň,
Baryp aglanýar-gülünýär,
Şeýdip mähriban bolunýar.

Toýuna halatly barýaň,
Öýüne ganatly barýaň,
Çybykdan “Gyratly” barýan
Körpejä süýji alynýar,
Şeýdip mähriban bolunýar.

Çala ýüregiň giňese,
Girjek bolaňok “Ginnese”.
Düýşüňe girse-girmese,
Halyndan habar alynýar,
Şeýdip mähriban bolunýar.

Öz wagtynda barjak bolup,
Sözüňde berk durjak bolup,
Käbir göwni görjek bolup
(Haýyrdyr) ýoldan galynýar,
Şeýdip mähriban bolunýar.

Ýüregiňi döküp gaýdýaň,
Oňatlyga bakyp gaýdýaň,
Arzuwlarňy ekip gaýdýaň,
Ýagşylyk iru-giç bilinýär,
Şeýdip mähriban bolunýar.

Hawa-la, bularyň bary
Etmeli zatlaryň ýary.
Adamzat döräli bäri
Bir gidilýär, bir gelinýär...
Şeýdip mähriban bolunýar.


Suraý BABANYÝAZOWA