24 ýaş.
Gyşdan soň bahar bar, baharyň soňy,
Bary bir gün, ýaşap geçýär kebelek.
Men welin bir günem ýaşamok heniz,
Ýaşym bolsa ýigrim dört ýyl tegelek.
Durmuş meňki, ömür meňki bolsa-da,
Şunça ýylyň bir güni hem meňki däl.
Satyn alan goşgy kitabym ýaly,
Kitap meňki; bir goşgusam meňki däl.
Dem almaklyk ýaşadyk däl sebäbi,
Düşünmeseň ýaşaýyşyň maňzyna.
Juda rahat, ýaşap ýörin keýpine,
Ruhdan düşmän, düşüp dünýäň yzyna.
Käte şu rahatlyk birahat edýär,
Gözlän wagtym ýitirmedik zadymy.
Hem bilemok, gözläp ýörün nämäni:
Yşk, many, pikir…ýa “adam” adyny?
Ýetir meni! Meni, ýary Ýaradan!
Gözleýänme, ýardam goluň uzat-da!
Gözleýänmi ömür boýy tapmasam,
Diýmek menden bir ömürlik uzakda.
Musa Ýusup. 05.09.2016
Käte şu rahatlyk birahat edýär, Gözlän wagtym ýitirmedik zadymy.
Bilim,
Telwas
tarapyndan
22-05-2022, 22:33