"TÜRKMEN IŞI"

1970ý
Asman barabar plan berdiler.
— Ýerine ýetir — diýdiler.
— Ullakan, başarmaryn — diýdi.
— Gaýtalatma, ýerine ýetir — diýdiler.
— Ýok, başarmaýan — diýdi.
— Tussag ederis!!! — diýdiler.
Başarmaly boldy... Çaga-çugasy köpdi...
Orden berdiler... Ýokary plany berjaý edeni üçin...
Soňra... Tussag etdiler... Goşup, galp ýazany üçin...
Çaga-çugasy köpdi bendäň...



ENE DILIM

Näçe köp dili bilseňiz, şonça gowy welin... Barybir, adam öz ene dilinde göz öňüne getirer, ene dilinde düýş görer, ene dilinde aglap-güler... Ölüm ýassygynda ýatyrka ene dilinde ejesini ýat eder.


GITMEZ BAÝLYK

Mende bir manat bar. Sizde hem bir manat bar...
Men öz bir manadymy size berdim.
Siz hem öz bir manadyňyzy maňa berdiňiz.
Hiç zat üýtgemedi. Sizde hem bir manat galdy, mende hem...
...Mende täze bir pikir bar. Sizde hem täze pikir bar.
Men size täze pikirimi aýtdym. Siz hem maňa öz täze pikiriňizi aýtdyňyz...
Sizde hem iki pikir peýda boldy, mende hem...
Käbir adamlar pul çalyşmaýar. Pikir çalyşýar!


PIŞIK

Özi itden gaçyp, daragta çykyp oturýar-da, soňra guşlara azar berip, mertlik satyp ugraýar... Gorkak batyr diýilýäni şu bolsa gerek!


PAGTAÇY

Köňli — pagta deý ap-ak. Häsiýeti — pagta deý ýumşak. Mähiri — pagta deý mylaýym. Diňe, birje aýby bar "pagta ýygmagy" bilmeýär!


KÖŇÜL

Adamyň hemme zatdan doýmagy mümkin. Baýlykdan... Keýpi-sapadan... Şan-şöhratdan.. hatda, ýaşaýyşdan hem... Garyplygynda, agyr hassalygyndan doýanlar hem "amanatyňy al indi, eý Ýaradan" diýýänler hem çyn dilden aýdýalar...
Adam hemme zatdan doýmagy mümkin. Diňe we diňe bir zat — MÄHIRDEN doýmaýar. Bu meselede Şa - gedaý desme deň.
Aslynda-ha, dünýäde şondan arzan zat ýok. Bir agyz şirin söz, bir çyn kalpdan çykan mähir kime artykmaçlyk edipdir?! Biz bolsa şony hem bir-birimizden gysganýas...