Men gitdim.
Meýletin gitdim uzaga,
Orun tapman giň dünýäňden bir daban.
Hiç zat meniň ýolum saklap bilmedi —
Täsin ýylgyrşyňam, täsin sözleňem,
Öňde gol bulaýan gara girdabam.

Gitdim şemallaryň göçüşi deýin,
Duýgularmy seçip gitdim teňňe dek.
Arzuwly günlerden dykyn yzymda
Galdy diňe zarlan yşkym diňmedik.

Belki, gözüňe-de ilen däldirin,
Senem indi söýgim barasynda dym!
Yssy küýsäp, göç edende durnalar
Menem şo-ol durnalaň arasyndadym.


Sapa HOMMADOW