Wah, ne gözel maşgala,
Keşde çekse sünnälän.
Bigadyra duş bolup,
Görýän güni gün däl-ä!

Belki, Allaň buýrugy
Arzuwynyň paşmany.
Basýar onuň egninden
Ýat illeriň asmany.

Bagt diýlen zat berlenok
Gözýaşa ýa badaga.
Indi gyzyň yhlasy
Şu ojaga sadaga.

Käbir gyzyň gylygy
Açmaýar hiç ýüregni.
Ynanýar hossaryna
Ykbalynyň küregni.

Dillenmegi kyn görer,
Bir utanjaň — ýazygy.
Üme düşmez eşitmez
Gyz kalbynyň sazyny.

Gyzy oda atanyň
Ýandak bitsin meýdine!
Günä galmak bolarmy
Bu döwürde beýdibem?

Gaýynlary öwse-de,
Hoş ýakanok gulaga.
Ýöne ile bildirmez,
Günlerinem bulamaz.

Bu öý bilen garyşar,
Çeker ýörer keşigni.
Ýuwar-ardar äriniň
Dolagyny, eşigni.

Söýgüsizem sebäp bar
Döremok, dogulmaga.
Ýüzi düşer bäbege:
Gyzlara, oglanlara.

Kem-kem ýatdan çykyşar
Arzuwlarnyň paşmany.
Häzir welin, egninde
Ýat illeriň asmany.


Çary ÝEGENMYRADOW