Tukat ýagyş jybarlaýar siňňitli
Ata Atajanow

*****
Tukat ýagyş jybarlaýar siňňitli
Gulak salyp barýan dünýäň hiňine
Şatlansaň hemmeler şatlanjak ýaly
Gama batsaňam, aýt kimiň piňine?!

Gulak salyp barýan dünýäň hiňine
Bir ýerlerden agysy-da ýaňlanýar
Tukat ýaly haýal barýar awtobus
Belki olam meniň ýaly gamlanýar

Tukat ýagyş jybarlaýar siňňitli
Tanyş dostum barýar işe alňasap
(Uzaklardan meni gördi, ümledi
Düşündim
Başlygna bermeli hasap)

Seniň küýi-köçäň mydam iş boldy
Geçirdiň iş bilen ömrüň deň ýaryn
Uzaklarda ejeň seni ýatlaýar
Başagaýsyrap soraňok oň halyn

Tukat ýagyş jybarlaýar siňňitli
Haýdap barýan şafýor, saklan azajyk
Hem öziňe, hem ýolagça rehim et!
Siziň üçin garaşyp dur çagajyk

Şafýor aga birazrak haýallatsaň
Ýada düşsün keýwany-da, çaga-da
Münen pikri sagaman öýne barmak,
Seniň pikriň eýýäm pellehanada

Tukat ýagyş jybarlaýar siňňitli
Käte güýçli ýagýar, käte seçeläp
Köçe boýy urşup barýar dört çaga
Iki söziň biri dogan-ejeläp

Men bilemok ösüp barýan dünýäde
Edep yza gaýdylmaly nämüçin?
Eje ýaly iňňän mukaddes sözem
Sögünçlerde aýdylmaly nämüçin?

Tukat ýagyş jybarlaýar siňňitli
Birden nazarym bir gyza dikildi
Galam bilen deňräk inçe ökjeli
Iki sapar büdräp, tasdan ýykyldy

Köýnegne mata ýetmedik gözel gyz
Uzyn köýnek geýseň bolarmy zyýan?
Ajap suwalan ýüz şeýle bulaşyk
Kemiräk çalaňda bolmazmy uýam?

Tukat ýagyş jybarlaýar siňňitli
Gidip barýar tanyş keýpihon ogul
Käte diýesiň gelýär, ýüzne bakyp
(Biderek doglupsyň, täzeden dogul!)

Ogly üçin işläp ýör ene-ata
Zähmet bilen ýatyp, daňyn ataryp
Uzaklarda ogly bolsa keýp edýär
Taýýar pula, özin bergä batyryp

Tukat ýagyş jybarlaýar siňňitli
Dilegçi dur eken,bir çola ýerde
Bakyp barýar gözler,
Wah... arman welin...
Wyždan görenok,
Ynsap näletkerde.

Wyždanyn, ynsabyn ýuwdan ynsanýet
Pul wajyp boldumy ,sogabyň ýerne?
Biderek zatlara sowýaň ençe pul
Dilegçi göreňde gözleýäň teňňe

Tukat ýagyş jybarlaýar siňňitli
Pikirlerim häli-şindi zenzele
Aýdyň maňa Ynsanýet nirä barýar?
Geljegimiz nirä?
Haýsy menzile?

Aýtsaň aýdyp, ýazsaň ýazybermeli
Düşnemok.
Allam öziň akyl eçil!
Ýa pikirler döwürdeň ösüp barýar...
Ýa pikirlem barypýatan köneçil...


Ylham GURBANALYÝEW (2021)