Nirede siz, ýazylmadyk goşgulam?
Ygyp ýörsüňizmi üzlemde-saplam.
Her wakanyň gapysyndan bir jyklap,
Barşyňyza gyýlyp peselýär taplam

Nirede siz, ýazylmadyk goşgulam?
Hany, jemleniňde geliň alnyma.
Ylham bilen suwlaň teşne kalbymy,
Bulut bolup siňip gitmäň salgyma.

Nirede siz, ýazylmadyk goşgulam?
Dolanyň-da ynjamaňda öýkeläp,
Bilýäňiz-ä mydam idelýäniňiz,
Garaşyp galamly elim owkalap.

Nirede siz, ýazylmadyk goşgulam?
Sizem meň ogullam, sizem meň gyzlam.
Uzaklaşyp gidäýseňiz sekimden,
Saz çalamda gamgyn çykar owazlam.

Nirede siz, ýazylmadyk goşgulam?
Gezmäň beydip ol keseki ýerlerde,
Siziň mekanyňyz- şahyr kalbydyr,
Orunlarňyz zehin joşýan serlerde.

Nirede siz ýazylmadyk goşgulam?
Geliň, saljak sizi ýürek sandyga.
Açaryny mydamalyk ýitirlek,
Yene gaçmak öwrülmäkä endige.