Ýeňilmedik gorkularyň,
Käte eýmendirmesi bar.
Ýaşlyk paslynyň bu ömri,
Yşka eýlendirmesi bar.

Bagt aldasa, hoş söz diýe,
Duýgularym dursun çeýe,
Diliňe bolmasaň eýe,
Kalby elendirmesi bar.

Boş gaýgylar - gury bede.
Sabyr eýle, geçer bu-da.
Ykbal Söýgä bolup guda,
Bagta öýlendirmesi bar.

Gezsem günäň ýükün çeke,
Sogabym çekiler çete.
Göz aýlaýyn saga, çepe,
Ömrüň oýlandyrmasy bar.

Berk bile erkim bir ede,
Mydam saklaýyn bileje.
Adama ýetse dereje,
Başyň aýlandyrmasy bar.

Ömrüň ygrary ne selki?!
Bolsa-da, bar baýlyk seňki.
Bilseň, bu dünýäniň soňky
ýola şaýlandyrmasy bar.

Hemme zat diliňde aňsat,
Bagt gelermi seni aňtap,
Nury ýigdiň şygry aňlap,
Şeýdip soňlandyrmasy bar.

Nury SAKÇYÝEW