Aýazly howa Täjigistanda we Gyrgyzystanda hasylyň bir bölegini weýran etdi we içerki islegi kanagatlandyrmak üçin bu ýurtlaryň ýolbaşçylary bu oba hojalyk önüminiň eksportyny gadagan etdiler. Gazagystanda we Özbegistanda şuňa meňzeş çäre eýýäm hereket edýär diýip, bu ýurtlaryň resmi metbugaty ýazýar. Bu barada ORIENT agentligi ýazýar.

Mälim bolşy ýaly, sogan bu ýurtlaryň däp bolan we milli tagamlarynda giňden ulanylýar. Emma Täjigistan içerki bazardaky ýagdaý durnuklaşýança diňe bir sogany däl, eýsem ýeralmadyr käşiriň eksportyny hem wagtlaýyn gadagan etdi.
Güýçli sowuk howanyň netijesinde täjigistanly daýhanlaryň ekinleriniň takmynan 10-12%-ne zyýan ýetdi. Metbugat habarlaryna görä, indiki hasyl mart aýynyň ahyrynda we apreliň birinji ongünlüginde alnar we ýurtda bakja ekinleriniň ätiýaçlyklary ýaza çenli ilatyň isleglerini kanagatlandyrar.
Gazagystanda soňky bir hepdäniň dowamynda soganyň bahasy 5,5% gymmatlady, ýöne gök önümleriň ýetmezçiligi ýok. Önümiň köpçülikleýin eksportynyň öňüni almak we onuň bahasyny saklamak maksady bilen, ýurtda eksport şu wagta çenli üç aýlap togtadyldy. Söwda we integrasiýa ministrliginiň hasaplamalaryna görä, düýp soganyň ätiýaçlyklary aprel aýyna çenli ýeter. Ondan soň, Täjigistan bilen baglaşylan şertnama laýyklykda, Gazagystana eýýäm irki sogan hem gelip başlar. Şeýle hem, önüm bilen üpjün etmek barada Pakistan we Özbegistan bilen gepleşikler alnyp barylýar.