Bagt diýlen zadyň bardygy
Owal-ahyrda çyn bolsa.
Bilgin, bagtyň daş ýardygy,
Bu dünýäde ejeň bolsa.

Çaga wagtyň bir deň-duşuň
Oýunjagny güjeňlese,
«Mende ýok» diýp, çytma gaşyň,
Alyp berer, ejeň bolsa.

Toýuňda-da, ýasyňda-da
Janköýerleriň jem bolsa,
Şolaryň arasynda-da
Nähili bagt ejeň bolsa!

Aladalar hemmä ýeter,
Käte ýüzüňde çaň bolsa,
Öz-özi süpüriler gider,
Bil, ýanyňda ejeň bolsa!

Birden çaý içip otyrkaň,
Käsäňde boýçy çommalsa,
Başgalara garaşma kän,
Gapyňdadyr, ejeň bolsa.

Diliňdekä şükür, toba,
Işiň ilerläp, oň bolsa,
Razydyr senden käbäň,
Barlap göräý, ejeň bolsa.

Intizar göz bilen garar,
Ýola şaýyň ykjamlansa.
Bilýänin öwreder, sargar,
Bosagaňda ejeň bolsa.

Garaşmaga başlar onsoň,
Girer-çykar, ynjalmasa.
Geleniňden hemmeden öň
Gujak gerer, ejeň bolsa.

Dünýäleriň doludyr-la,
Ulam bolsaň, kiçem bolsaň.
Ýürejigiň suwludyr-la,
Gapdalyňda ejeň bolsa.

Gurbanýaz Daşgynow
Çeşmesi: https://ahal.info/tm/news/ejen-bolsa-gurbanyaz-dasgynow. 20.02.2023ý.

File engine/modules/thanks.php not found.