Bir zat başarýan-a diýmäýin
Bu gün
Men söýmekden başga nämedip bilýän?
Dogry men beýik däl,
Bolman geçeýin,
Bir başym bar onam sämedip bilýän.

Aýdym aýdýan,
owazym ýok üýtgeşik,
Begenýän sesimi eşidýär älem.
Öz dünýämde şa gyzy men,
beýleki
Ähli dünýäleriň şalygyn nädem?

Gaýyryp görmändim uly işleri,
Ýöne iş edýäne bermeýän päsgel.
Gül ýolma däl,
edil şu hal gapyda
Gülleň açylyşy meň üçin has geň.

Bagt tapylmaýar özge ýerlerden,
Bagt her ynsanyň köňlünden gelýär.
Nägile bolsam-da, özüm özümden,
Men söýmekden başga nämedip bilýän?!

Suraý Babanyýazowa
2017 ý.