Küýsäniň, söýen ýürege
Duşan çagyň şolduryn men.
Daň şuglasy ak derege
Düşen çagy şolduryn men.

Tüm gijede uklan tallar
Oýananda şolduryn men.
Lebleriňde şeker-ballar
Goýalanda şolduryn men.

Alyslara kirpikleriň
Gezelende şolduryn men.
Bu jahana gelşik berip,
Bezenende şolduryn men.

Müň bir gülden peşgeş baryn
Dadanyňda şolduryn men.
Ýüzüň çawlap epgek-ýalyn
Ýandyranda şolduryn men.

Hyýallaryň düýne bakan
Alyp gitse, şolduryn men.
Ýüregiňi gamgyn mukam
Dilip gitse, şolduryn men. 

Gül pudakda bir eýjejik
pyntyk görseň, şolduryn men.
Özgelerden sähelçejik
artyk görseň, şolduryn men.

Rejepgeldi Mejikow