DOSTLARYMA

(Hassanyň oýlary)

Besdir, ýanym alyp oturmaň beýdip,
Gidiň-de aýlanyň, geziň dünýäni.
Siz ejiz däl, ýa küýki däl, ýa göýdük,
Boýuňyz bar depe ýaly, diň ýaly.

Erbetligi gowulyga özgerdiň,
Synlap säherlerde derin gülleriň.
Men ýaşaýşyň ýalňyz ejirin gördüm,
Siz lezzetin goşawuşlap gönderiň.

Kesel oglanlykdan ýüregmi dilen,
Goýmady ol sekiden hem bakmaga.
Siz ýaşlyk hyjuwňyz, dogmuňyz bilen
Ýazgydyň jylawyn buruň asmana.

Puç eken ömürden söýgi daş düşse,
Söýlüň hem-de ýürek bilen söýüň siz.
Bir gowy gyz gözüňize kaklyşsa,
Belki, dostum söz aýdardy diýiň siz.

Aýry ýüreklermiz deň gülmese-de,
Meňzeş bolmasa-da ýanan ýerimiz,
Soňuna çen ýaşaň, deň gelmese-de,
Hakykatlarmyz hem ýalanlarymyz.

Synlap ýetişmedim Watanymy men,
Enem-atam üçin etmedim bir iş.
Emma sähradaky güllere aýdyň,
Görmesem-de söýdüm köklerne deňiç.

Maňa bakyp göwnüňizi etmäň dar,
Az mahaljyk “gelseňiz bor” käýarym.
Häzirlikçe size bakarlygym bar,
Belki, onda dabanňyzdan tanaryn.

2021. Mary

Wepa Pirnepesow