ÝALBARÝAN JAN OGLUM...
(Ogluny ýitiren ejesinden)

Dertden doly gursagymyñ içini,
Bir pursat perzendim ezizlesene.
Bagra basyp söýüp bilmen hiç kimi,
Düýşümde bolsam-da gujak gersene,
Ýalbarýan jan oglum gaýdyp gelsene.

Senli geçen hakydamy eledim,
Soñlanmajak geljegime deñedim,
Buzdan beter doñdum, otdan eredim,
Basyldy, basyldy dünýä üstüme,
Ýalbarýan jan oglum gaýdyp gelsene.

Ajy gaýgylarmy kalbyma salyp,
Uky girmez bilmen günim ataryp,
Dogry ýodalardan ýykylyp galyp,
Biri "Eje" diýse bakýan dessine,
Ýalbarýan jan oglum gaýdyp gelsene.

Jan diýenim gara toprak düşedi,
Emma keşbiñ ýüregimde ýaşady,
Sen gidensoñ ähli zatlar üýtgedi,
Barja arzuwlarym döndi tersine,
Ýalbarýan jan oglum gaýdyp gelsene.

Düýn ýaly-dy ýörjen-ýörjen ylganyñ,
Mertdir oglum diýip ogşap aýanym,
Tolkun deý bat uryp ajy ykbalyñ,
Gämisin batyrdy gussaly sene,
Ýalbarýan jan oglum gaýdyp gelsene.

Iki dünýä seniñ bilen dilegim,
Şindi oglum meniñ jennet melegim,
Her giz saña ejzileýär ýüregim,
Men bir ýeke galan bialaç ene,
Ýalbarýan jan oglum gaýdyp gelsene.

Awtor: Jemşit Hajymämmedow