Men seni bir eýýäm "aldyrypdyryn",
Sowapdyr mähirden püre-pür ýeriñ.
Duýmandyryn tutan çagym elleriñ,
"Ajalyñ" kalbyñda köw-söwlän demin.

Sönüp gitdiñ,
Gaýyp gitdiñ gözümden,
Sen bolmasañ "senden" maña ne nep bar?
Köpden bäri men düýnlerde ýaşaýan,
"Bu günlerden" gaçmagyma sebäp bar...

Kölegämden bukup ýörün özümi,
Aýnalary gizläp çykdym ýüzümden.
Garañkylyk garaldypdyr gabagym,
Sen maña üýtgäpsiñ diýip geñleme—
Perdeleri syrylypdyr gözümden,
Görmesiz zatlary görüp başladym...
Bulutlar abanýar,
garalýar dünýäm
Ýöne näm üçindir ýaganok ýagyş..?
Aýtsana,
                sen munuñ jogabyn bilýäñ...

Ýa-ha senden köp zatlary isläpdim,
Ýa saña bir zady kemter beripdim.
Ýalançy-ha däldiñ yöne näm üçin
Hak sözden kem rysgal sözler beripdiñ?!

Tebigatam saña boýun egdi:rdim
(Öte geçsem bagyşla ýa Ýaradan).
Tomusda depäñden ýagdyryp gary,
Ýasardym men eremezek gar adam.

Sen isleseñ ýaz ýagşyna öwrülip,
Saçyñ ezip, lebleriñe damardym.
Ýa, bolmasa, şemal bolup daglaryñ
Howasyndan señ jigerñe salardym.

Arzuw etsek ýyldyzlara ýeterdik,
Ýekän-ýekän söküp yhlas tekjesin...
Tiz döwüldi uzak ýola niýetläp
"Gymmatbaha" alan köwşüñ ökjesi...

...Ynha, bu gün ýürekdäki jesediñ,
Gömüp gaýtdym daş oturdyp üstüne.
"Ölen" ynsan meniñ nämäme derkar?!
Ölen bolsañ gömülmeli dessine!

O dünýäñde gezip ýörmüñ hezilmi?
Ne tüýs bir ýer biwepalañ "
Jenneti"?
Bagyşla ýasyñam tutup bilmedim,
"Kyrkyñdan" soñ galmady oñ gymmaty.

Edepli Gödekow.