Perişdeler günä sogabym sanap,
Şeýtanam azdyrjak özüni gynap,
Belki Kadyr Allam durandyr synap,
Bu günlerem geçer sabyr et göwnüm.

Danalar ýazypdyr baryn kyssalap,
Odun ýylatmasa durma tüsseläp,
Elmydam ýatmarsyň dertli hassalap,
Bary ara açar sabyr et göwnüm.

Aýaklaryň barka metjide howluk,
Ýagşylyk et onsoň dilegin gowluk,
Bary bolmadykdeý gidäýer sowlup,
Kalbyň bagty guçar sabyr et göwnüm.

Arzuwlaryň bolsun munda gyratyň,
Hiç darykma pese düşen halatyň,
Elmydama gyrlyp durmaz ganatyň,
Olam bir gün uçar sabyr et göwnüm.

Bir pursatda bagtyň daş ýarar ylla,
Kimselerem ony gözläp hyllalla,
Ýazgydyň ýazanda ol Kerim Alla,
Ýedi ölçäp bir biçer sabyr et göwnüm.

Ynam bolsa güýç taparsyň uçmaga,
Başarmaly ýoluň saýlap seçmäge,
Gapylaryň gulpalaryny açmaga,
Taparys bir açar sabyr et göwnüm.

Ýyksalarda käte göwün tagtyňy,
Boş geçirme öz gymmatly wagtyňy,
Birgün senem gözläp ýören bagtyňy,
Taparsyň her haçan sabyr et göwnüm.

Süleýman Tekäýew