Söze erk edýändir şahyrlaň bary,
Meniň halypamam olaryň biri,
Elime galamym alalym bäri,
Halypama meňzäp ýazasym gelýär.

Sözlerden jöwahyr merjenin gözläp,
Setirlerim bilen dogryny sözläp,
Ençe yhlas etdim saklaman gizläp,
Halypama meňzäp ýazasym gelýär.

Şahyrlar baýdyrlar ýagşy dilege,
Wyjdanymy menem salýan elege,
Hakykat ýakymly gelýär gulaga,
Halypama meňzäp ýazasym gelýär.

Goý on gezek ýyrtyp ýazaýyn birin,
Özüň medet bergin Pyragy pirim,
Döwedim kütekläp giňeldip gorum,
Halypama meňzäp ýazasym gelýär.

Kalba ylham berýä poeziýa yşgym,
Sözlerden ýaratdym hyýaly köşgüm,
Setirlemde saçyp behişdiň müşgün,
Halypama meňzäp ýazasym gelýär.

Haýran bolýan şygryn okap berende,
Söz bir ötgir okdur gadryn bilende,
Göwnüm galkyp ruhum galyp belende,
Halypama meňzäp ýazasym gelýär.

Güýjüm ýetmez gudrat döreder ýaly,
Sebäp tapýan galam ýöreder ýaly,
Okyjyň kalbynda ýer eder ýaly,
Halypama meňzäp ýazasym gelýär.

Ýalňyşlarmy ýüze aýdar göz aýlap,
Bildimmikäm şägirtlige golaýlap,
Ýürekdäkim aýdyp il güne paýlap,
Halypama meňzäp ýazasym gelýär.

Horjuny doludyr goşgy kyssadan,
Allam daş etsindä gaýgy gussadan,
Ynamyňy ödedimmi Ussadym,
Meniň saňa meňzäp ýazasym gelýär.

Süleýman Tekäýew