Sensiz urmaz bu ýürek,
Barlygyňda diri men.
Jadylaýjy eý melek,
Gözleriň ýesiri men.

Akyl paýhas goýalyp,
Gidip barýas boý alyp,
Söz sözleseň uýalyp,
Sözleriň ýesiri men.

Jemaly kalba gaçan,
Unutmaryn hiç haçan,
Baryňda güller açan,
Ýazlaryň ýesiri men.

Diňläniňde eredýän,
Kalp töründe ýer edýän,
Söýgä hyjuw döredýän,
Sazlaryň ýesiri men.

Yşk derdin çekmek ýeke,
Jana jepa kyn eken,
Ýüregime ýol çeken,
Yzlaryň ýesiri men.

Diýme maňa edepsiz,
Bagladyň goýduň ýüpsüz,
Gyz bolarmy ejapsyz,
Näzleriň ýesiri men.

Bir gün bolarsyň meňki,
Saçyňda gijäň reňki,
Sensiz oňmaryn, çünki,
Gözleriň ýesiri men.

Süleýman Tekäýew