Päklenme
Ýaňlan, Ýaremezan!
Oraz aýynda
Sogapdan beýgelýär ynsan depesi,
Açyň gapyňyzy,
ýelejiresin,
Päkligiň şuglasy,
halal nepesi,
Kalba hoş dem salyp,
ýürege girsin.
Dogaly dilegler,
azan, namazlar,
Süňňüňe aramlyk – kanagat bersin.
Ýaremezan sesi – ynsan ähline,
Iman päkligine baky çagyryş.
Gursagyňy ýuwýan,
kalbyň arçaýan,
Göwünlere melhem,
ylahy ýagyş.
Nurana asmanly,
degresi şanly,
Sogap daglarynyň galkýar niçesi.
Ykbala — ýalkaýyş,
imana — röwşen,
Beýik iliň bu sahawat gijesi.
Serwer gijesiniň şapagy elwan,
Göreçden göreje muhabbet ýagýar,
Ol öýden ol öýe hoş söhbet ýagýar,
Ýalkanan bendileň ýüreginiň sesi,
Agyz açyp, okalan töwire sygýar.
Orazaň çyragy – nurana ýalkym,
Ýalkaw daragtynyň sogap nygmaty.
Ejazasy – Hakdan,
dilegi Halkdan,
Bir baýlyk edindi köňli seždeli-
Oň keremi Ýere-Göge sygmady,
Mübärek mukaddes Oraz aýynda!
Gadyrly ýöreýär halal ädimler.
Başy bitinlikde,
Agzybirlikde,
Hydyr açsyn, gapyňyzy, adamlar.
2 комментария