EJEM

Penjiräniň çep taýynyň
Syrylgydyr ak perdesi.
Ysy geler gök çaýynyň,
Eşdiler ünjüli sesi.

Isle gije, isle gündiz,
Geler wagtym biler ejem.
Ähli işin unudyp tiz,
Şol penjirä geler ejem.

Bellidir gözüniň ýerem,
Şol nokatdan jyklar durar.
Mensiz nahar iýmez birem,
Ýola garap, ýoklar durar.

Gyňajynyň ujy bilen
Aýnamyzdan sylar çaňy.
Eger öýe gelmesem men,
Dik durup atyrar daňy.