Ilki bilmändiris, hakykatlygyn,
Aýrylan ekenik, şo gezek güýzde.
Baglaň başyndaky tukatlyklary,
Her gezek synlaýan, geçip gidemde.

Güýzüň reňki bilen garylyp gidýän,
Söýgi däl-de aýralygy ýitirdim.
Seniň umman gözleň güýzüň gerşinde,
Maňa undulmajak şöhrat getirdi.

Aýralyk söýginiň sary sulbasy,
Ony bu güýz içre tapmadym gözläp.
Şygyrlarym hut aýralyk hakynda,
Şoň üçin sary reňk, lezzetsiz şöhrat.

Ýat ýerlerden geçip giden guşlar deý,
Gözlermi şol baga dikýän-de gidýän.
Ne söýgiden nyşan, ne aýralykdan,
Ne-de senden habar getirýär ykbal.

Bagtly günler kän bolmadyk bolsa-da,
Bagtsyz günleň ählijesin ýeňipdik.
Biz indi yşga däl, ejizlik bilen
Aýrylanlaň sanawyna giripdik.

Näme üçindigin bilebilmedik,
Gussalary şöhrat getirýär yşgyň.
Bu gün boş hiňňillik üwreýän baglaň,
Arasynda görýän, hasratyň keşbin.

Yşgyň geçendigin bilýänem bolsak,
Indi aýralykda boýun alsak,ýar.
Garaňky baglaryň sary keşdesi,
Ýakanyň gaýmasyn ýadyňa salýar.

Biz aýralyk hakda agzamasagam,
Aýrylypdyk, bir-biregi söýýän dek.
Şol sary ýodanyň ýaplara siňen,
Öýkeler hem mensiz oňup bilmändir.

Görsene,aýralyk nirede galdy,
Bile aldap ýörüs, birek-biregi.
Görsene, aýralyk etegne salyp,
Süýräp barýar, meniň söýýän ýüregmi.

Güýzüň sakar ýabyn syryp çalaja,
Aýralygyň şol pyşyrdan gezegi,
Sen çynyň bilen hem aýdan ekeniň,
Goňparyp göwrämden janly ýüregi.

Ah indi, ah indi datly aýralyk,
Şojagaz ýerlerem terk ede-ede.
Meniň şindem özün küýseýänimi,
Ýadyndan çykaryp, gitdi dünýeden.

Görsene, o ýoda, o sadaja ýap,
Hem şol agzy burlan bir gap ýorunja.
Baglar hem otyrlar, başlaryn sallap,
Gollaryn galgadyp, ýalňyz gelin dek.

Indi aýralygam garaşyp bilmän,
Giden eken, şol baglaryň teýinden.
Meni şonda çäksiz ahmyra goýup,
“Seni, diňe seni söýýän” diýen kim?

Ah aýralyk, nirede şol aýralyk,
Baglar tazygypdyr, ýekeliklerne.
Aýralygyň ýerni, yşgyň ýerini,
Alypdyr dünýede tükeniksizlik.

Asyl şo güýz aýrylanňy syzdyryp,
Aýdypsyň, men düşünmedik ekenim.
Yşgyň mazary men, aýralygyň hem,
Sary güýz reňkine çümen kepeni.

Oguljennet BÄŞIMOWA.