Angliýanyň çempionatynda sanawyň 1-2-nji orunlaryndaky iki toparyň – Liwerpul bilen Mançester Sitiniň duşuşygy diýseň çekeleşikli geçip, ýatdan çykmajak oýunlaryň biri boldy. Birinji ýarymy golsuz geçen oýunda Liwerpul 2 gezek öňe geçse-de Siti ikisine-de jogap bermegi başardy. Soňky ýyllaryň iň ýatda galyjy duşuşyklaryň biri hökmünde hasaba alnan oýunda Liwerpulyň gollaryny Mane bilen Salah, Sitiniň gollaryny-da Foden bilen De Bruýne geçirdi. Bu deňlikden soň, iki topar hem bir orun aşak düşdi.

Mançester bilen Liwerpul şäherleriniň beýleki iki klubunyň – Mançester Ýunaýted bilen Ewertonyň arasyndaky oýunda ýeňiş gazanan bolmady (Marsial 43 – Tawnsend 65). Duşuşykda Kristiano Ronaldo Premier Ligadaky 200-nji duşuşygyny oýnady.

Öz meýdançasynda Southemptony soňky minutlarda geçiren gollary bilen 3-1 ýeňen Çelsi sanawyň täze lideri boldy.

Möwsüme şowly başlan Tottenham öz meýdançasynda Aston Willany Hýoýberg hem-de Targettiň (ö.d.) gollary bilen 2-1 ýeňip, 3 tapgyrdan soň 4-nji ýeňşini gazandy.