“Gowynyň gadyryny bilsinler” diýip,
Erbetlik diýen zat döränmiş kem-kem.
Hemmeler Gowynyň gadyryn bilse
Erbetlik äleme inmejek eken.


“Ŷaşlygyň gadyryn bilsinler!” diýip,
Gojalyk ýerinden turanmyş kem-kem.
Hemmeler ýaşlygyň gadyryny bilse—
Gojalyk gojalyp öljegem eken.


“Söýginiň gadyryny bilsinler!” diýip,
Hasrat gözlerini açanmyş kem-kem.
Hemmeler söýginiň gadyryny bilse—
Hasrat ukudanam turmajak eken.


“Saglygyň gadyryny bilsinler!” diýip,
Kesel diýilýän zat döränmiş kem-kem.
Hemmeler Saglygyň gadyryn bilse,
Äleme inmezdim—diýýärmiş—Kesel.


“Adamyň gadyryn bilsinler!” diýip,
Gaharlanyp Ölüm inenmiş Ŷere.
Her kim bir-biregiň gadyryn bilse—
Ölüm Gelen ýerine gitjekmiş ýene.