Adamlaryň ruhy ösüşinde iň esasy aýratynlygy, başgalara oňyn tarapdan ylham bermekdir. Bu adamlar beýleki adamlary üstünlik gazanmaga höweslendirýän görnüşde gürleşýärler we hereket edýärler. Daş-töweregimizdäki adamlaryň içindäki oduň tutaşmagy üçin, olara motiwasiýa bermeli. Eden her bir ýagşy işine gadyr goýup, olara ylham bermeli.

Bir kakasy we kiçi ogly tokaýda gezelenje çykýarlar. Birnäçe wagtdan soň oglan: "Kaka, ýadadym, meni eliňde göteräý?!"-diýipdir.
Kakasy eşitmedik bolup, üns bermän ýöremäge dowam edipdir.
Emma ogly: “Kaka gaty ýadadym, haýyş edýän meni arkaňa al”-diýipdir.
Kakasy: “Bagyşla oglum, gynansakda men seni göterip bilmerin, sebäbi, menem ýadadym”-diýipdir.
Bu jogaby eşden çaga, aglap ýere urnup başlapdyr, meni göter diýip. Onsaň ýaňky kakasy agajyň bir şahasyny goparyp, çagaň eline berýär. “Al oglum, saňa bir at. Atyňa mün, öýümize gideli!”
Çagaň begençden gözleri gülüp başlaýar. Uly begenç bilen taýagy iki aýagynyň arasyndan geçirip öýlerine tarap, “dygydyk, dygydyk, dygydyk” diýip ylgamaga başlapdyr.

Bu hekaýadaky kakanyň edişi ýaly, iň ýakynlarymyzdan bolsa-da hiç kimi arkamyzda götermeli däl. Diňe olara ylham berip, ýol görkeziji hökmünde öz aýaklarynyň üstünde nähili durmalydygyny öwretmeli.
Adamlara ýol görkezenimizde olaryň kemçiliklerinem oňyn bir dil bilen aýtmaly. Emma şol kemçilikleri aýdýan mahalymyz olary günäkärleýji we höküm ediji görnüşde gürlemezlige çalyşmaly. Aslynda käbir ýalňyşlyklarymyz biriniň kemçiligini ýüzüne aýdýan wagtymyz ýüze çykýar. Şuny unutmaň, näme aýtýanymyzdan kän, nähili aýtýandygymyz möhümdir.
~~~~~~~~~~~~~~~~~~~~~~~~~~~~~~~~~~~~~~~~~~
Dünýäde her bir adam üçin iň möhüm söz öz adydyr. Hatda köp adam öz adyna aşyk bolýar diýen ýaly. Şeýle-de geçirilen bir gözlegde adamlaryň hatda öz atlaryndaky harplary hem öz atlaryndaky däl harplardan has gowy görýändikleri görüldi.

At- adamyň şahsyýetidir.
Ynansaňyz, köp adamlar adynyň manysyna laýyk gelýän şahsyýeti emele getirýärler.
Hany, bizde “adyna eýe bolsun” ýa-da ulalanda “tüýs adyna mynasyp eken” ýaly sözlerem bardyr.
Käbir geçirilen barlaglara görä, öz adyny kabul edip, adyny söýýän adamlaryň şahsyýetleri belli bir wagtdan soň adyna laýyk gelýär. A halamaýanlaryňky bolsa atlarynyň manysyna laýyk gelmeýär.
Eger çagalarymyzyň gowy bir şahsyýet bolup ýetişmegini isleýän bolsak, at dakylanda gowy gözleşdirip, pikirlenip, ulalandan soň özüniňem söýäýjek gowy manyly ady dakmaly.
Käbir gözleglerde, eger aragatnaşykda garşyňdaky adamyň adyny tutup ýüzlenseň, ony boýun egdirmek mümkinçiligiňiz artykmaçdygy anyklanyldy.

Täze tanyşan adamyňyza ady bilen ýüzlenmek, ony haýran galdyrmagyň iň gysga usulydyr. Aragatnaşygyň maksatlarynyň biri hem beýleki adama täsir etmekdir. Hatda bir gowy sözüň üsti bilen hem beýleki adamy eliňizde tutup biljekdigiňize şübhelenmäň. Mysal üçin, “Siziň kömegiňize mätäç" ýaly özüne çekiji sözler beýleki adamy ynandyrmakda täsinlikler döredip biler. Geplänimizde "biz" dilini ulanmak hem köplenç garşymyzdaka gowy täsir edýär. Mysal üçin, "Geliň, bu mesele boýunça bilelikde karar bereliň" diýlende, beýleki adamy ynandyrmak has aňsat bolýar.

Il içinde "Jadyly söz" diýen meşhur söz bar. Hakykatdanam, bir söz beýleki adama gaty täsir edip biler we düşünjesini düýbünden üýtgedip biler. Adamlaryň sögünçli we gargynçly sözlerden ybarat bolan sözlemleriň netijesinde biri-birini urýandygyny, öldürýändigini ýa-da gaty erbet sögüşýändiklerini pikir etsek, sözleriň adamlara edýän täsirine has gowy düşünip bileris.

Pikirlerimiziň dünýä iberýän energiýa toplumy bolşy ýaly, agzymyzdan çykýan sözler başgalara iberýän has güýçli energiýa toplumymyzdyr. Sebäbi sesli pikirler has köp energiýa döredýär. Şonuň üçin ses bilen güýçlendirilen energiýanyň täsirliligi hem gaty ýokary bolýar. Pikirlerimiziň gatnaşyklarymyzy ugrukdyryşy ýaly, ulanýan sözlerimiz gatnaşyklarymyzda has köp zat edýär. Şonuň üçin içerki we daşarky gepleşiklerimizde sözlerimizi saýlap ulanmaly. Şahsy sözlügimiz esasan oňyn sözlerden ybarat bolmaly. Oňyn sözleri ulanmagy endik etsek, olaryň güýjüne göz ýetireris. Meselem, "Söýgi, rehimdarlyk, ýagtylyk, gözellik, ýagşylyk, hakykat, sazlaşyk, bagt, şatlyk, janlylyk, joşgun, şatlyk, bolçulyk, gün, deňiz, agaç, gül ..." sözlerini tüýs ýürekden aýdanymyzda, içimize rahatlyk dolýar.

Ruh gözelligi.