Kynçylygy,
kemçiligi derňäp,
Ýanmaly biz aýralygyň oduna
Ähli minuslary bir ýere jemläp,
Bileje salaly ony modula

Geljegimiz barybir "x" diýme sen,
Hökman ugry bardyr - hasaplar ýaly!
"Iller näme diýer?!" söze köýme sen,
Teorema däl-ä biz - subutlar ýaly!

Hem gideli matematkaň tersine
1+1=3 bolaly,
4 bolaly,
5 bolaly (nesibe..)
Saglyk, şatlyk köpeldilsin hersine...
...Galany-da bagly Taňryň berşine,
Ýagşy niýet, gitmeris hiç hesibe

"n" derejeli bagt bolsun biz bilen
Daşymyz gurşasyn üçburçlyk ýaly
Emma amal etmän, geçsek söz bilen,
Bularyň barysy "boş köplük" ýaly...


Ylham GURBANALYÝEW