Girip peri sypat keşbe,
Ýüregime çekip keşde,
Aşygyň tükenmez yşga,
Goýan gyz senmidiň serwim.

Dälmiş saňa hemmeler taý,
Bakyşlaryň kalba serpaý,
Öz taýyňy daşdan tapaý,
Diýen gyz senmidiň serwim.

Bilmen doňuň haçan çözler,
Seň keşbiňe zardyr gözlem,
Gözlerimden diýjek sözlem,
Duýan gyz senmidiň serwim.

Seniň dünýäň inçe duýgy,
Çekdirip ýör gussa gaýgy,
Ýüregime mähir söýgi,
Guýan gyz senmidiň serwim.

Men gyz seniň boldum teşnäň,
Lebleriňde bolsuw çeşmäň,
Lybasyny näz kereşmäň,
Geýen gyz senmidiň serwim.

Kararym ýok hiç bir ýerde,
Gutar razy sözüň berde,
Süleýmany soňsuz derde,
Goýan gyz senmidiň serwim,

Süleýman Tekäýew