Bir gezek şeýleräk sowal berdiler:

"Dünýäde mukaddes iki zat näme?"

Pikir edip, jogap gözläp durmadym,

Jogap berdim: "Olar - ata we ene".



Ýene-de şeýleräk sowal berdiler:

"Dünýäde mukaddes iki kelime..?"

Jogap berdim: "Beýik Taňrydan soňra

Bu iki kelime - ata we ene".



Soň-soňlar ýene-de sowal berdiler:

"Iň uly ejizlik düşdi kimlere?"

"Öz balasy özüne el göterse,

Iň ejiz adamlar - ata we ene".



Soňra bolsa hiç kim sowal bermedi,

Emma welin jogap berdim men ýene:

"Ynsanlar, bu uly Dünýäň manysy

Iki sözde, olar - ata we ene".