Ýatlaýanym üçin ýazgarmaň meni,
Ýadyňdan çykarmak mümkin däl ony,
Ýanyňdan aýrylman ýanap gezýär ol,
Gün däl her demiňi sanap gezýär ol.

Ömür bilen bagly sahawaty ýok,
Rehimdar duýgusy şepagaty ýok,
Piňiňe almaýar niýet-päliňi,
Diňlejek bolmaýar arzy halyňy

Mydam gar ýagyp dur onuň ýüzünde,
Gizlenere ýer ýok onuň gözünden,
Gelende hiç kime görünmän gelýär,
Ýadaman ýaltanman günde jan alar.

Gulagy eşitmez ahy-nalany,
Ýokdur onuň ýigrenýäni halany
Garry bol,aş bol sen, saýgarmaýar ol
Gedaý bol,baý bol sen,gaýgyrmaýar ol.

Oraklap orup ýör ömür gülünden,
Gelenler gitmeli onuň elinden,
Çenber örüp düýe çňkermeýär ol,
Hiç kimi ýadyndan çykarmaýar ol.

Gara ýapynjasy solmaar onuň
Kakmajak gapysy bolmaýar onuň
Oky boş geçmeýän ýeke-täk awçy
Bir gezek gelende äkidýän sawçy.

Saňa sähet belläp oturmaýar ol,
Äkitse gaýtaryp getirmeýär ol,
Her kim hemaaty Hakdan sorasyn,
Oňa ir duşmakdan Alla gorasyn.

Didarberdi Allaberdiýew